“મોરબી મનપાનો મહત્ત્વાકાંક્ષી પ્રોજેક્ટ: એ.સી., ઓપન ટેરેસ અને આધુનિક સુવિધાઓ સાથે નવી લાઇબ્રેરી”

Advertisement

Advertisement

મોરબી શહેરના નાગરિકોમાં વાંચન સંસ્કૃતિનો વિકાસ થાય, વિદ્યાર્થીઓ અને સ્પર્ધાત્મક પરીક્ષાની તૈયારી કરતા યુવાનોને આધુનિક સુવિધાઓ સાથે ઉત્તમ વાંચન સ્થળ ઉપલબ્ધ થાય તે હેતુસર મોરબી મહાનગરપાલિકા દ્વારા શહેરના રવાપર રોડ, નરસંગ ટેકરીની બાજુમાં અદ્યતન સુવિધાઓથી સજ્જ નવી મોડર્ન લાઇબ્રેરી નિર્માણ કરવાની યોજના હાથ ધરવામાં આવી છે.જેમાં ત્રણ માળની વિશાળ લાઈબ્રેરી બનાવવામાં આવશે.

હાલમાં આ મોડર્ન લાઇબ્રેરીના નિર્માણ કાર્ય માટેનું ટેન્ડર પ્રક્રિયા લાઇવ કરવામાં આવી છે અને ટેન્ડર પ્રક્રિયા પૂર્ણ થયા બાદ તાત્કાલિક કાર્ય શરૂ કરવામાં આવશે. આ લાઇબ્રેરી શહેરના વિદ્યાર્થીઓ, વાચકો તેમજ સ્પર્ધાત્મક પરીક્ષાની તૈયારી કરતા યુવાનો માટે અત્યંત ઉપયોગી સાબિત થશે.

આ મોડર્ન લાઇબ્રેરીમાં વાચકોને આધુનિક અને આરામદાયક વાતાવરણ મળે તે માટે ફુલી સેન્ટ્રલ એ.સી. સુવિધા ઉપલબ્ધ કરાવવામાં આવશે. લાઇબ્રેરીના તમામ વિભાગોમાં સુવ્યવસ્થિત અને આધુનિક ફર્નિચર વ્યવસ્થા કરવામાં આવશે જેથી વાચકોને લાંબા સમય સુધી આરામથી અભ્યાસ કરી શકાય.

લાઇબ્રેરીમાં વિવિધ ક્ષેત્રોની તમામ પ્રકારની પુસ્તકો (બુક્સ) ઉપલબ્ધ રહેશે, જેમાં સ્પર્ધાત્મક પરીક્ષાઓ માટેના પુસ્તકો, સાહિત્ય, ઇતિહાસ, વિજ્ઞાન, ટેકનોલોજી સહિતના વિવિધ વિષયોના પુસ્તકોનો સમાવેશ કરવામાં આવશે. સાથે સાથે વિદ્યાર્થીઓ અને વાચકો માટે સેપરેટ રીડિંગ એરિયાની પણ સુવિધા રાખવામાં આવશે જેથી શાંતિપૂર્ણ વાતાવરણમાં અભ્યાસ કરી શકાય.

લાઇબ્રેરીનું નિર્માણ R.C.C. ફ્રેમ સ્ટ્રક્ચરમાં કરવામાં આવશે, જે ભૂકંપ અવરોધક (Earthquake Resistant) માળખા સાથે બનાવવામાં આવશે જેથી ભવિષ્યમાં સુરક્ષિત અને મજબૂત ઇમારત ઉપલબ્ધ રહે.તે ઉપરાંત આ લાઇબ્રેરીમાં એક વિશેષ આકર્ષણ તરીકે ઓપન ટેરેસ લાઇબ્રેરીની સુવિધા પણ ઉપલબ્ધ કરાવવામાં આવશે, જ્યાં વાચકો ખુલ્લા અને કુદરતી વાતાવરણમાં વાંચન અને અભ્યાસ કરી શકશે.

મોરબી મહાનગરપાલિકા દ્વારા હાથ ધરાયેલ આ આધુનિક લાઇબ્રેરી પ્રોજેક્ટ શહેરના શૈક્ષણિક વિકાસમાં મહત્વપૂર્ણ યોગદાન આપશે અને વિદ્યાર્થીઓ તથા નાગરિકોમાં વાંચનની સંસ્કૃતિને વધુ પ્રોત્સાહન મળશે તેવી અપેક્ષા વ્યક્ત કરવામાં આવી છે.

Advertisement

Advertisement