મોરબીમાં બોગસ પત્રકારોની હવે ખેર નથી: રૂ.10 હજારમાં વેચાતું ‘પ્રેસકાર્ડ’ લઈને ફરતો બ્રેઝા ચાલક ઝડપાયો, DYSPની કડક ચેતવણી

મોરબી શહેરમાં પત્રકારના નામે નકલી આઈડી કાર્ડ (પ્રેસકાર્ડ) બનાવીને કાયદાનો ભંગ કરતા તત્વો સામે પોલીસે લાલ આંખ કરી છે. મોરબી એ ડિવિઝન પોલીસે બાતમીના આધારે એક બ્રેઝા કારના ચાલકની ધરપકડ કરી છે, જેણે માત્ર રૂ. 10,000માં નકલી પ્રેસકાર્ડ ખરીદ્યું હતું. આ મામલે ડીવાયએસપીએ (DYSP) કડક આદેશ આપતાં જણાવ્યું છે કે, જે લોકો પાસે આવા વેચાતા નકલી કાર્ડ છે તેઓ જાતે જ પોલીસમાં જમા કરાવી દે, અન્યથા જેલના સળિયા ગણવાનો વારો આવશે.

ટોલ ટેક્સ બચાવવા ‘પ્રેસ’ લખાવીને ફરતો કાર ચાલક ઝડપાયો

ગઇકાલે મોરબી એ ડિવિઝન પોલીસની ટીમ પેટ્રોલિંગમાં હતી, તે દરમિયાન રોડ પરથી પસાર થતી એક શંકાસ્પદ બ્રેઝા કારને અટકાવવામાં આવી હતી. આ કાર પર મોટા અક્ષરે ‘PRESS’ લખેલું હતું.

પોલીસે કાર ચાલક અસલમ હુસેનભાઈ શેખની અટકાયત કરીને પૂછપરછ શરૂ કરી ત્યારે તેણે પોલીસ સમક્ષ રોફ જમાવવાનો પ્રયાસ કર્યો હતો. તેની પાસેથી ‘પ્રેસ ઓફ ઇન્ડિયા’ લખેલું એક ઓળખપત્ર મળી આવ્યું હતું. જોકે, પોલીસની કડક પૂછપરછ સામે નકલી પત્રકારનો આ રોફ લાંબો સમય ટક્યો નહીં.

 પૂછપરછમાં ખુલી પોલ: રૂ. 10,000માં ખરીદ્યું હતું કાર્ડ

પોલીસે જ્યારે ચાલક પાસે પત્રકારત્વના કોર્સની ડિગ્રી, સરકારી માહિતી ખાતાના માન્ય આધાર-પુરાવા કે સંસ્થાના રજીસ્ટ્રેશનની માંગણી કરી, ત્યારે તેની પાસે કોઈ જ કાયદેસરના દસ્તાવેજો નહોતા. આખરે અસલમ શેખે પોતે નકલી પત્રકાર હોવાની કબૂલાત કરી હતી.

કોની પાસેથી ખરીદ્યું? ‘પ્રેસ ઓફ ઇન્ડિયા’ના રાધેશ બુદ્ધભટ્ટી નામના વ્યક્તિ પાસેથી.

કેટલા રૂપિયા આપ્યા? રૂ. 10,000 રોકડા ચૂકવીને આ કાર્ડ મેળવ્યું હતું.

મુખ્ય હેતુ શું હતો? હાઈવે પર ટોલ ટેક્સ બચાવવો અને પોલીસ ચેકિંગ દરમિયાન કાયદાકીય કાર્યવાહીથી બચવું.

હાલ આ સમગ્ર કૌભાંડ અંગે એ ડિવિઝન પોલીસ મથકમાં ગુનો નોંધીને આગળની તપાસ તેજ કરવામાં આવી છે.

DYSPનું અલ્ટીમેટમ: ‘નકલી કાર્ડ જાતે જ જમા કરાવો, નહીંતર પોલીસ ઘરે આવશે’

આ કેસની ગંભીરતાને જોતા મોરબી DYSP દ્વારા નકલી કાર્ડ ધારકો અને બોગસ પત્રકારોને ખુલ્લી ચેતવણી આપવામાં આવી છે:

“જે પણ લોકોએ રૂપિયા આપીને કે અન્ય કોઈ ખોટી રીતે આવા નકલી પ્રેસકાર્ડ મેળવ્યા છે, તેઓ તાત્કાલિક એ ડિવિઝન પોલીસ સ્ટેશનના તપાસ કરનાર અધિકારી સમક્ષ પોતાના કાર્ડ જમા કરાવી દે. જો કાર્ડ જમા નહીં કરાવવામાં આવે તો પોલીસ જાતે એવા તત્વોને શોધીને ગુનો દાખલ કરશે.”

પોલીસે સ્પષ્ટ કર્યું છે કે મીડિયા જેવા પવિત્ર વ્યવસાયના નામે ખોટો રૂઆબ છાંટનારા, વાહનો પર ‘પ્રેસ’ લખાવનારા કે બોગસ આઈડી કાર્ડ રાખીને ફરતા કોઈપણ શખ્સને બક્ષવામાં આવશે નહીં.