હળવદમાં કચ્છ રેન્જનો મોટો સપાટો: આઇશર ટ્રકમાંથી રૂ. 32.84 લાખનો વિદેશી દારૂ ઝડપાયો, હરિયાણાનો ડ્રાઈવર ઝડપાયો

હળવદ-માળીયા હાઇવે પર કવાડીયા ચેકપોસ્ટ નજીક કચ્છ રેન્જની ટીમે મોટી કાર્યવાહી કરી આઇશર ટ્રકમાંથી 9,456 બોટલ વિદેશી દારૂનો જથ્થો ઝડપી પાડ્યો છે. પોલીસે રૂ. 52.98 લાખના મુદ્દામાલ સાથે હરિયાણાના ડ્રાઈવરની ધરપકડ કરી વધુ તપાસ શરૂ કરી છે.

આ અંગે મળતી માહિતી મુજબ સરહદી રેન્જ ભુજના નાસતા ફરતા સ્કોડના પોલીસ સબ ઇન્સ્પેક્ટર અને તેમની ટીમને બાતમી મળી હતી કે હળવદ-માળીયા હાઇવે પરથી દારૂનો મોટો જથ્થો પસાર થવાનો છે. આ બાતમીના આધારે કવાડીયા ચેકપોસ્ટ પાસે જાહેરમાં વોચ ગોઠવવામાં આવી હતી. આ દરમિયાન શંકાસ્પદ હાલતમાં પસાર થઈ રહેલી એક આઇશર ટ્રક નંબર HR-38-AE 0201 ને અટકાવીને તેની તલાશી લેવામાં આવી હતી. તલાશી દરમિયાન તેમાંથી અલગ-અલગ બ્રાન્ડ અને સાઇઝની કંપની સીલપેક વિદેશી દારૂની કુલ બોટલ નંગ – ૯,૪૫૬ કિંમત રૂ. ૩૨,૮૪,૨૬૮/- તથા આઇસર કિંમત રૂપિયા ૨૦,૦૦,૦૦૦ તથા મોબાઇલ ફોન નંગ -૦૧ કિંમત રૂપિયા ૫૦૦૦ મળી કુલ કિંમત રૂપિયા ૫૨,૯૮,૨૬૦ નાં મુદ્દામાલ સાથે આ આરોપી ટ્રક ડ્રાઈવર અરબાઝ રહીશ મેવ (ઉ.વ.૨૨) રહે. હરિયાણાવાળાને ઝડપી પાડી પુછપરછ કરતા અન્ય બે શખ્સો ટ્રક આપનાર આશીફ તથા માલ મોકલનાર શર્માજી નું નામ ખુલતા પોલીસે તમામ વિરુદ્ધ પ્રોહિબીશન એક્ટ હેઠળ હળવદ પોલીસ સ્ટેશનમાં ગુનો નોંધી કાયદેસરની કાર્યવાહી હાથ ધરી છે.