વાંકાનેરના પંચાસીયા હત્યા કેસમાં કોર્ટનો કડક ચુકાદો: મુખ્ય આરોપીને આજીવન કેદ

વાંકાનેર તાલુકાના પંચાસીયા ગામે વર્ષ ૨૦૨૧માં બનેલા ચકચારી હત્યા અને મારામારીના કેસમાં મોરબીના બીજા એડીશ્નલ સેશન્સ જજ મીતલકુમાર રસિકલાલ નાદપરાની અદાલતે મહત્ત્વનો અને કડક ચુકાદો આપ્યો છે. આ કેસમાં અદાલતે મુખ્ય આરોપી બાલુભાઈ લાભુભાઈ કોંઢીયાને ભારતીય દંડ સંહિતાની કલમ ૩૦૨ હેઠળ દોષિત ઠેરવી આજીવન કેદની સજા તથા રૂા. ૫,૦૦૦/- નો દંડ ફટકાર્યો છે. આ ઉપરાંત કલમ ૩૦૭ (હત્યાના પ્રયાસ) હેઠળ ૧૦ વર્ષની કેદ અને અન્ય કલમો હેઠળ પણ સજાનો હુકમ કરવામાં આવ્યો છે.

ઘટનાની વિગતો મુજબ, તા. ૩૦/૧૧/૨૦૨૧ના રોજ રાત્રે પંચાસીયા ગામે યુવતીને ભગાડી જવા બાબતની બોલાચાલી અને ઝઘડા દરમિયાન આરોપી બાલુભાઈએ આવેશમાં આવીને કુહાડી તથા છરી વડે આડેધડ હુમલો કર્યો હતો. આ હુમલામાં વચ્ચે પડેલા રાજુભાઈને છરીના ઘા ઝીંકી દેવાથી તેમનું ગંભીર ઈજાઓને કારણે મૃત્યુ નીપજ્યું હતું, જ્યારે પરિવારના અન્ય સભ્યોને પણ લાકડી અને હથિયારોથી ઈજાઓ પહોંચાડવામાં આવી હતી. આ ન્યાયિક પ્રક્રિયા અને ટ્રાયલ દરમિયાન સરકારપક્ષ તરફથી મજબૂત રજૂઆતો કરવામાં આવી હતી, જેમાં રેકોર્ડ મુજબ સરકારી વકીલ તરીકે સંભ્ય હવે અને મદદનીશ સરકારી વકીલ દ્વારા કેસની પેરવી કરવામાં આવી હતી.

અદાલતે કેસમાં રજૂ થયેલા ૨૮ મૌખિક અને ૫૪ દસ્તાવેજી પુરાવાઓની ચકાસણી કરી આ આખરી હુકમ કર્યો હતો. ચુકાદા અનુસાર મુખ્ય આરોપીને સજા કરવામાં આવી છે, જ્યારે પુરાવા અને શંકાના આધારે કેસના અન્ય સહ-આરોપીઓ લાભુભાઈ ભલુભાઈ અને દુધીબેન લાભુભાઈને શંકાનો લાભ આપી નિર્દોષ મુક્ત કરવાનો આદેશ આપવામાં આવ્યો છે.