મોરબી જિલ્લામાં દારૂબંધી અને જુગારધારા જેવી કાયદેસરની મનાઈ હોવા છતાં જુગારના અડ્ડાઓ ધમધમી રહ્યા છે. મોરબી તાલુકા પોલીસને ગુપ્ત બાતમી મળી હતી કે વાઘપર ગામે પ્લોટ વિસ્તારમાં રહેણાંક મકાનમાં મોટી સંખ્યામાં લોકો એકઠા થઈ જુગાર રમે છે. આ બાતમીને આધારે પોલીસે રેઇડ કરતા ધમધમતા જુગારધામનો ભંડાફોડ કર્યો હતો.
મળતી માહિતી મુજબ, મોરબી તાલુકા પોલીસની ટીમ પેટ્રોલિંગમાં હતી, તે દરમિયાન તેમને વાઘપર ગામે ભરતભાઈ ઉર્ફે દાઉદ રામજીભાઈ પટેલના રહેણાંક મકાનમાં જુગાર ચાલતો હોવાની ચોક્કસ બાતમી મળી હતી. ત્યારબાદ પોલીસે સ્થળ પર પહોંચી દરોડો પાડ્યો હતો.
દરોડા દરમિયાન મકાનની અંદર જુગાર રમતા કુલ ૧૨ ઇસમોને રોકડ રકમ રૂ.૭૮,૩૦૦ના મુદ્દામાલ સાથે ઝડપી પાડવામાં આવ્યા હતા.
આ બનાવમાં પોલીસે નીચેના આરોપીઓને કાબૂમાં લીધા છે. જેમાં ભરતભાઇ ઉર્ફે દાઉદ રામજીભાઇ પટેલ (ઉ.૪૯, વાઘપર), સંજયભાઇ કેશુભાઇ પટેલ (ઉ.૪૦, વાઘપર), બચુભાઇ જીવરાજભાઇ પટેલ (ઉ.૬૦, ધરતીપાર્ક સોસાયટી, મોરબી), મનસુખભાઇ ચતુરભાઇ પટેલ (ઉ.૫૫, વાઘપર), વિનોદભાઇ બચુભાઇ પટેલ (ઉ.૫૨, વાઘપર), અરવિંદભાઇ ધનજીભાઇ સુરાણી (ઉ.૫૩, વાઘપર), ભરતભાઇ ગાંડુભાઇ પટેલ (ઉ.૪૭, વાઘપર), રમેશભાઇ વાલજીભાઇ પટેલ (ઉ.૫૪, વાઘપર), ભાવેશભાઇ ઉર્ફે મુન્નો પરબતભાઇ ધ્રાંગા (ઉ.૪૫, નાગડાવાસ), ગોપાલભાઇ મનજીભાઇ પટેલ (ઉ.૬૫, વાઘપર), જેશંગભાઇ જશાભાઇ રાઠોડ (ઉ.વ.૬૦, વિધુતનગર, મોરબી) અને જયસુખભાઇ મોહનભાઇ પટેલ (ઉ.૬૦, વાઘપર).
પોલીસે તમામ આરોપીઓને કાબૂમાં લઈને જુગારધારા હેઠળ ગુનો નોંધ્યો છે. સાથે જ સ્થળ પરથી રોકડ રકમ રૂ.૭૮,૩૦૦ તથા જુગારના સાધનો સહિતનો કુલ મુદ્દામાલ જપ્ત કરવામાં આવ્યો છે.
મોરબી તાલુકા પોલીસે આ કાર્યવાહી કરીને વિસ્તારના અન્ય જુગારધામોમાં પણ ચકચાર મચાવી છે. પોલીસે જણાવ્યું હતું કે, આવા ગેરકાયદેસર કાર્યો સામે સતત ચેકિંગ ડ્રાઈવ ચાલુ રહેશે અને સામેલ વ્યક્તિઓ વિરુદ્ધ કાયદેસરની કડક કાર્યવાહી કરવામાં આવશે.
